Kum 1979 vel khan Upa Lalkunga kawmthlang a\angin kan venga Di in leh Rangva in awmzat kan chhiara, khatihlai khan Di-in a la tam zawkin ka hria. kum 1980 hma lama Chanmari West lan chian deuhna thlalak neite hi kan awm em le? A hmuhnawmin a lunglenthlak ngawt ang. Tunah hian Di-in leh rangva in ni lovin Rangva In leh RCC in intam hleih dan khaikhin a \ul ta thung, kan veng hi kan changkang ve ta hle a ni.
Aizawl-hi pem khawmin kan siam len a ni a, Chanmari West pawh hi pemkhawmin kan siam len tho a ni. A pem lut hmasa apiang kha mihlun an ni a, chung mihlun ho chuan tuna kan kalkawng, kan school, kan library leh vantlang tana hmunhma kan neihte hi harsa takin an lo sualchhuak a, an zarah keini kan nihlawh a, kan mi hmasate hi zah leh chawimawi an phu hle.
Veng \henkhatah chuan Officer lian tak takte, ram hruaitute, contractor lian leh sumdawng liante an awm teuh a, keini vengah chuan hetiang hi kan nei tam lo hle, chuvangin hun rei tak chu veng chuanawm lutuk lo kan ni \hin a, veng chhuanawm lutuk lo kan nih avangin kan nula tlangval hawiher pawh veng dangah a veikhawr ru viau \hin. YMA hruaitu lam an fing vara ‘Chanmari kawn in thlen chhohin zum duk suh u, mi aiin indah hniam bik suh u’ tiin member-te an fuih sauh sauh \hin. Hun a lo kal zela infiamna lamah leh Hnam La^mah a thiam ber berte zingah kan tel chho a, a veng mipui kan lo \hahnem bawk nen Chanmari West nula tlangval chu mi vengah pawh an kimki chuih chuih ta bik lo, a nihna takah chuan kan pawr ta lutuk mah mah emaw ni chu aw a tih theih. Tichuan kan \hahnem a, kan \angrual bawk avangin khawi hmunah pawh Chanmari West kan ti pawr ve thei ta a. Presbyterian kohhran bikaah phei chuan Kohhran member tamna ber kan ni chho a, mahse kan len berna hi chhuan tham erawh a ni lo; member 10 bi leka lian ber kan ni. A nihna takah chuan Voter tam lamah Electric, Ramhlun South, Mission veng te kan aiin an la tam zawk.
“Kan lian, kan ropui” han ti \hin mah ila; Synod level, CK|P level leh Central YMA level-ah hi chuan kan la ropui lo viau a, CK|P OB pawh kan la nei lo, Central YMA CEC lamah pawh kan la tel thei meuh lo chu a ni. Hman kum lawkah CYMA Sub Committee peng pakhatah Hunthar veng pa Chairman-na hnuaiah kan President kha Secretary atan an rawn ruat he haw kha. Salvation Army leh UPC lamah hi chuan rinai takin an Headquarters lamah kan vengmi an lut nasa thung.
Sialsuk-pa hla phuah thiam Lal\anpuia chuan ‘Sial khawpui’ a phuaha he hla hian zoram dung leh vang a deng chhuak a. Sialsuk khua, Aizawla pema Aizawla in leh lo neia kum 30 chuang awm tawh pawh hian an awmna veng leh Aizawl hi ka khua an ti hlei thei lo, he hla hian a awi lungleng tlat a, hla hi chuan thil a va ti thei tak em! Mahni khaw hla nei ve lo Sialhawk-pa Pu R Lalchhuanawma, kum 1987 vela he venga rawn awm tawh hian Sialhawk a la ti ve fo ang em le?
Thingtlanga piangte’n kan khua an ti fo ang tho hian he venga piang seilian, engemaw avanga khaw dang leh veng danga pemte hian ‘Kan Chanmari West’ an tih ve fo ka ring. Kei pawh hian Lal\anpuia hla ka ngaihthlak hian ‘Aw Chan khawpui ka pianna hmun, ka seilena.......la la la’ ka lo ti \hin. Ni e, mahni pian seilenna hi chu a lo nuamin a chhiat kan duh lo.
Ka pian, ka seilenna chu hmanah \hen darhin a awma, a in\hen darhte lamah kan awm a, veng indang chuan neih aiin neih loh kan ngah a. Mi vengah han leng ila Chanmari leh West chu sawifiah deuh a tul \hin. Aizawlah hian veng nih nuam lem lo a awm \hin a, chung ang zingah chuan tel chiah lo mah ila Veng chhuanawm tak chu kan ni ngai lo. Kan veng chu kan tangrual a, mihring kan pung chak a, tunah chuan veng nuam leh chhuanawm tak a lo ni ta. Chutiang kan nih mek lai chuan Kohhran lian ber a in\hen dawn a, hei hian thil thui tak a hril thei a, Kohhran a indan avang ringawt hian Chanmari West hi a in\hensawm tur tihna a ni kher lo va, YMA member-te kan lungrual phawt chuan veng lian leh nuam tak a nihtir chhunzawm zel theih a, chutiang a nih loh chuan veng te reuhte pathumah a chhuak thei thung ang.
Rotekawla sepa ang mai a thil ngaihtuah leh tih duh mihring tlemte thu kan zawm chuan kan veng hi \hendarhin a la awm ang a, he veng hmangaih a, veng lian leh ropui nih duh mi tam zawk thu anga kan kal chhoh chuan Chanmari West hian Zoram khawvelah a \ha zawngin Par a la chhuang zel thung ang. He veng kal chhoh zel dan tur chu nang leh kei kan in thurual danin a la hril chhunzawm zel ang a, he veng chungchang ngaihtuah a nihin he venga piang seiliante rilru hi min ngaihtuahpui ve \hin sela a va lawmawm dawn em!